(മാതൃഭൂമി വാരാന്തപ്പതിപ്പില് 01 Nov 2009-നു സി. ജയ്കിഷന് 'ഒറ്റപ്പെണ്പട്ടാളം' എന്ന തലക്കെട്ടില് എഴുതിയ ലേഖനം ഇവിടെ കട്ടെഴുതുന്നു.)
''അവള് മരിച്ചാല് അതിനുത്തരവാദി ഇന്ത്യന് പാര്ലമെന്റായിരിക്കും'' - സമാധാനത്തിനുള്ള നൊബേല് പുരസ്കാര ജേത്രിയായ ഇറാനിലെ മനുഷ്യാവകാശ പ്രവര്ത്തക ഷിറിന് എബാദി മാധ്യമ പ്രവര്ത്തകര്ക്കു മുന്നില് പൊട്ടിത്തെറിച്ചു. ''അവള് മരിച്ചാല് അതിന്റെ ഉത്തരവാദിത്വം കോടതിക്കും പട്ടാളത്തിനും അനങ്ങാപ്പാറനയം പിന്തുടരുന്ന ഭരണാധികാരികള്ക്കുമായിരിക്കും. കടമ നിറവേറ്റാത്ത നിങ്ങള് പത്രക്കാരും ആ മരണത്തിന് കാരണക്കാരായിരിക്കും''.
2006 ഒക്ടോബറില് ന്യൂഡല്ഹി 'എയിംസി'ല് നിരാഹാരമനുഷ്ഠിക്കുന്ന ഇറോം ഷര്മിളയെ സന്ദര്ശിച്ചശേഷമായിരുന്നു എബാദിയുടെ ഈ രോഷപ്രകടനം. ഇനിയും അണഞ്ഞിട്ടില്ലാത്ത സമരജ്വാലയായി ഇറോം ഷര്മിള ഇപ്പോഴും മണിപ്പുരിന്റെ തലസ്ഥാന നഗരിയായ ഇംഫാലിലെ ജവാഹര്ലാല് നെഹ്റു ഹോസ്പിറ്റലില് പോലീസ് കസ്റ്റഡി വാര്ഡില്. ഷര്മിളയുടെ നിരാഹാരം നവംബര് രണ്ടിന് പത്താം വര്ഷത്തിലേക്ക് കടക്കുകയാണ്.
